Framkvæmdastjóri Kristniboðssambandsins hefur verið önnum kafinn að ferðast á milli staða í Pókothéraði í Keníu og að hitta fólk. Má segja að hver taki við af öðrum. Heimsóknin hefur verið mjög gefandi og stórkostlegt að sjá hvernig starfið vex og vex og að forsvarsfólk starfsins vex með starfinu. Sérlega ánægjulegt hefur verið að hitta fólk sem hefur verið trúfast í starfinu öll árin. Á miðvikudag var farið langa leið hér inn á fjöllin m.a. til að skoða framhaldsskóla sem byggður var fyrir fjármuni frá Íslandi. 
Í gær var farið norður til Kara-Pókt þar sem nýjasta boðunarstarfið er og síðan var í dag fundað um það starf sem SÍK styður með um 400 þúsund krónum í ár. Á morgun, sunnudag, á að heimsækja kristniboðsstöðina í Chepareria (Propoi) og heilsa upp á gamla vini, fara síðan út í bæinn og skoða kirkjubygginguna sem Ólafur og Þóra söfnuðu fjármunum til í tilefni af 50 ára afmælum sínum í fyrra. Síðan verður farið upp á fjall og málin rædd við safnaðarstjórnina í Tolkoghin, á fjallinu beint fyrir ofan Chepareria.

Á mánudag liggur leiðin fyrst til Nairobi og um kvöldið þaðan til Eþíópíu.