Starfsmenn Kristniboðssambandsins fengu í morgun góða heimsókn frá nemendum í 4. K í Hvassaleitisskóla. Í tengslum við góðverkadaga í skólanum söfnuðu börnin í bauk og vildu með afrakstrinum styrkja verkefnið Af götu í skóla sem unnið er á meðal götubarna í Addis Abeba, höfuðborg Eþíópíu.

Nemendurnir stöldruðu við á skrifstofu kristniboðsins og fengu að sjá myndband um það hvernig verkefnið hefur breytt lífi og kjörum fjölmargra götubarna í Eþíópíu til hins betra.  Alls söfnuðust 11.450 krónur sem munu nýtast vel í starfinu. Guð elskar glaða gjafara!