Í greininni á undan um Haíti gleymdist að minnast á að Hjálparstarf kirkjunnar stendur líka fyrir söfnun til styrktar hjálparstarfs á svæðinu.  Söfnunarsími 907 2003 og reikningur 0334-26-886 kt. 450670-0499 (www.help.is). Við hvetjum alla sem geta lagt þeim lið að taka þátt.

Á meðan heimurinn horfir með skelfingu á fréttir af hryllilegum afleiðingum jarðskjálftanna sem urðu á Haiti þann 12. jan. hefur Kristniboðssambandið áhyggur af örlögum þeirra sem lifðu skjálftana af. Við biðjum vini okkar og velunnara að biðja fyrir fórnarlömbunum og hjálpa þeim eftir bestu getu. Við hvetjum þá sem geta gefið til hjálparstarfsins að gera það gegnum söfnunarsíma Rauða Krossins 904 1500 eða með beinum framlögum á bankareikning 0342-26-12, kt. 530269-2649. (www.redcross.is)

Jarðskjálftinn kemur niður á fátækasta landi á norðurhveli jarðar. 80% íbúanna býr undir fátæktarmörkum og helmingur íbúanna lifir á minna en 100 krónum á dag.
Jarðskjálftinn eyðilagði flestar byggingar í höfuðborginni Port-au-Prince. Kristniboð og kirkjur hafa ekki farið varhluta af eyðileggingunni. Skrifstofa hjálparstofnunarinnar World Vision tilkynnti að hús þeirra væri gjörónýtt. Framkvæmdastjóri samtakanna sagði að starfsfólkið væri nú upptekið við að útvega hjálpargögn svo sem teppi, sápur, föt og drykkjarvatn, sem ætti að dreifa hið fyrsta.
Skriftstofa annarra samtaka Compassion International, sem styður munaðarlaus börn, bíður enn eftir upplýsingum um afdrif 60 starfsmanna sinna og 62.900 barna sem hafa stuðningsaðila víðs vegar um heiminn.

Þúsundir manna eru í losti og ráfa um göturnar, grátandi og veinandi. En fréttir berast einnig af kristnu fólki sem safnast saman á götum úti, biðjandi og syngjandi. Á tímum náttúruhamfara eins og nú hafa riðið yfir er gott að vita að íbúar Haiti geta leitað til hans sem er öruggt skjól, Drottins Jesú Krists.
Kirkjur um víða veröld taka þátt í hjálpastarfi á Haiti.
Guð sendir ekki slíkar hörmungar yfir fólk en hann sendir okkur til að hjálpa og auðsýna kærleika í ógæfunni.

Milljónir kristinna manna í koptísku kirkjunni í Egyptalandi fögnuðu fæðingu frelsarans 6. janúar en þá eru jól hjá þeim samkvæmt tímatali þeirra. Óþekktur árásarmaður hóf skothríð á kirkjugesti að lokinni guðsþjónustu í Naga Hammadi, bæ skammt frá borginni Luxor. Sex menn voru drepnir, þar af lögregluþjónn, og sjö slösuðust í skotárásinni. Árásir á kristið fólk í Egyptalandi hefur aukist undanfarin ár.

David Harder, starfsmaður SAT-7 sjónvarpsstöðvarinnar, segir þetta skelfilega árás á kristið fólk á helgasta degi ársins og biður fólk að minnast aðstandenda þeirra í bæn.

Árásir á kristið fólk á jólum hafa verið gerðar á fleiri stöðum en í Egyptalandi. 24. desember var gerð sprengjuárás á kirkju í bænum Mósúl í Írak. Þar létust tveir og fimm slösuðust. SAT-7 leggur áherslu á að auka skilning á milli múslima og kristinna manna svo þeir geti búið í sátt og samlyndi. David hvetur kristna menn um allan heim að biðja fyrir fórnarlömbunum og fjölskyldum þeirra. Einnig biðja Guð um að þessir hörmulegu atburðir megi leiða eitthvað gott af sér.

Nánar á: www.sat7.org