Nóg er um að vera í Pókothéraði í Keníu. Sunnudaginn 30. október verður nýr biskup vígður, en hann er einn af elstu prestum kirkjunnar og heitir Samson Lokipuna. Einnig stendur yfir umfangsmikil endurskoðun á fjármálum kirkjunnar eftir að í ljós kom að fjármunir sem voru hugsaðir eða fráteknir fyrir ákveðin verkefni voru notaðir til að koma af stað kennaraskóla í Chesta. Hefur Jón Fjölnir Albertsson verið á kafi vegna þess máls.

Loks má geta þess að kristniboðarnir okkar Skúli Svavarsson og Kjellrun Langdal hafa verið önnum kafin við kennslu, sálgæslu og ráðgjöf í nokkrar vikur, bæði í Kapenguria og eins víða um héraðið. Þá eru systkinin Besty Halldórsson og séra Frank M. Halldórsson einnig í Kapenguria. Hún sinnir kennslu og hann kynnir sér starfið og tekur þátt í því eftir því sem tækifæri gefast.